صباح الخير

صبح صبح يا عم الحج

امنية

اليوم وانا اقرا بهالجرايد واحوس بالمدونات اتابع الاحداث اللي قاعده تصير بالديره .. احداث عجيبة غريبة والله

...

ليش الناس صارت بدون اخلاق ؟ الاخلاق ترى مو بس تتكلم بصوت واطي والا تلبس محتشم والا تسلم على الرايح والراد او 24 ساعه مجابل المسجد ! لا هذي مو اخلاق .. الاخلاق انك تحب الارض اللي انت قاعد تدوسها كل يوم .. انك تحافظ عليها مثل ما تحافظ على عيونك .. انك تحميها مثل ما تحمي عيالك .. تحميها بتصرفاتك المسئوله .. انك تحب لها الخير وتعطيها مثل ما اهي تعطيك ومغرقتك بخيرها ... ياناس عيب اللي قاعدين تسوونه بالديره والله عيب ... الكويت ما تستاهل كل هذا منكم !! هذا جزاها يعني ؟؟

اللي لفت نظري في احداث الفرعيات انهم قاعدين يصلون جماعه !! الصلاة مو تنهى عن المنكر ؟ شلون تصلون وانتوا قاعدين تطقون الشرطه ؟؟ بدل لا تقولون لهم الله يعطيكم العافيه وتحطون ايدكم بايدهم عشان هالديره هذا تصرفكم معاهم ؟؟ عيل ليش قاعدين تصلون ؟؟ روعتوا الديره .. عيشتونا بقلق ...شلون توقفون بيد الله سبحانه وبعد ما تخلصون تفسدون بالارض !!! وين طاعة اولي الامر ؟؟ ما تعرفونها اكيد

عيب عليكم واللـــــــــــــــــــــــــــــه عيب

انا اتمنى شي واحد .. يمكن امنية غريبة ومجنونه الى حد كبير لكنها جان زين تتحقق ... اتمنى ان كل واحد يكره الكويت وولائه طائفي والا قبلي والا مادي .. كل واحد باق ورشا واتلف وضيع وعطل كل مصلحة للوطن حتى اللي يقط كلينكس من دريشة السياره .. اتمنى انه يتركها الى الابد .. يهج عنها ما نبيه يروح يدور له ديره يعيش فيها على جمر ونار وشوك عشان يعرف قيمة هالديره اللي قاعد يرفسها وينكر خيرها عليه .. الديره اللي عطته ووفرت له كل سبل العيش الكريم .. عايش بقصر وماكو بيت بالكويت مو قصر حتى ال 375 متر صارت قصور .. وظايف ومعاشات تقاعديه .. مدارس ومعاهد وكليات وجامعات .. علاج في الداخل والخارج .. مجلس امه دشه الحابل والنابل والمترديه والنطيحه ... صراخ وتلعلع ماله لا اول ولا تالي ولا احد غواهم ورا الشمس

شنو يصير لو طلعوا هذول من الكويت ؟؟؟

خلل

خلل فني !

زحمة

طالت الغيبه :(

_________________________

مر علي سؤال في احدى المدونات وهو :- شنو احلى شي في الدنيا ؟

وايد صعب هالسؤال ! بالنسبة لي طبعا

الصراحه ما قريت الردود على هالسؤال لانه جد شغل تفكيري

شنو احلى شي بالدنيا صج .. مادري !جد مادري

_______________________________

خيبة امل كبيرة اقرب ما تكون صدمة .. صدمة ما تخيلتها لكن قريتها

في الروايات وشفتها في الافلام والمسلسلات بس .. لكن الزمن ما قصر

كان كريم معاي انا شخصيا ونتيجة هالكرم خلتني اتسائل :- شنو يعني رحمة ؟

_______________________________

قاعده بروحها ماسكة الريموت كنترول وتقلب بقنوات التلفزيون...

عمرها ما ضرت احد .. حمامة بوسط البيت ..خدمت الصغير قبل الكبير ..

وشنو حصلت ؟

صج اللي قال الطيب ماله نصيب لكن اجرها عند الله

______________________________

حاولت تنتقد تصرف سلبي صادفته بالشارع ؟ شنو كانت النتيجه ؟؟

تحسفت انك تحجيت والا ارتحت انك وصلت انتقادك ؟؟

الناس تتحمل انك تنتقدها بشي ؟ والا يا ويلك ان فجيت حلجك ؟

_____________________________

ودي اعرف متى يحترم المقيم الديره اللي قاعده تكد عليه ؟؟

والا الكل ماشي على مبدأ من امن العقوبة اساء التصرف !!

____________________________

ذبحتنا الانفلونزا هالايام ! كله من الحكومه

هذا اللي ناقص !!!

بسنا تحلطم

اول ما قررت اسوي لي مدونة قلت ماراح اكتب شي عن السياسة لاني ابيها تكون متنفس لي .. لمشاعري ولهمومي .. حبيت انها تكون صديقة لي اشكي لها وافضفض لها عن كل اللي بقلبي وعقلي .. لكن !!! من خلال زياراتي لبعض المدونات اللي اغلب كتاباتها لها طابع سياسي لاحظت البعض يكتب بكل تمكن ومثل ما يقولون يحط صبعه على الجرح .. هالنوع تلقاه يريحك وان كان يحزنك الموضوع السياسي اللي قاعد ينتقده .. الراحه تلقاها في انك تحس فعلا انه هو يبي مصلحة البلد ,, يبي الناس تغير للاحسن والارقى واكثر ما تشوف هالشي في التعليقات وتفاعل القارئين معاه



اما النوع الثاني فتلقاه يكتب بالسياسه كتابه اقرب من انها تكون سب وتجريح.. كلام عايم على بعضه.. تحس انك قاعد بجهنم من طريقة كتابته .. ساعات تكره نفسك .. ساعات انا اتاثر بهالجو .. مادري احس جني مكهربه .. يمكن ليش ان عيبي ابي كل شي يكون مثالي او شبه مثالي وهذا غلط ادري بس شسوي سبحان الله خلقني جذي :)



صار لي تقريبا شهر وانا اقرا بهالمدونات .. الشي الوحيد اللي طلعت منها السلبيه الا ما ندر طبعا .. الكل ينظر للواقع بمنظار اسود اعوذ بالله .. الكل قاعد يشوف النهاية قربت .. ليش هالتشاؤم ؟ صح في اوضاع بالديره يبي لها تعديل مو بس تعديل الا نسف وتفجير .. لكن مو بهالطريقة !!! في ناس تحتاج تنقل لها الوضع بصورة واقعيه بدون اي تعصب وتهويل لانه بياخذ طرف السالفه ويعيد ويزيد فيها وتصير مثل كرة الثلج وطبعا هالشي مو في صالحنا ولا صالح الديره خصوصا هالوقت هذا



ليش ما نحاول نصلح نفسنا قبل ؟؟ اكيد بتقولون مافينا شي يتصلح .. لا .. في وفي اشياء وايد يبي لها تصليح وتعديل قبل لا نطلب من غيرنا انه يتعدل ... ابسط مثال جم واحد فينا يصف طابور ؟ جم واحد اذا شبت الاشاره ينطر السياره اللي جدامه تمشي قبل لا يطق هرن ؟ جم وحده شافت روحها بالمرايا قبل لا تطلع من بيتها ؟ جم ام وابو قالوا حق عيالهم عيب ؟ والا شنو هاالبس اللي لابسينه ؟؟ جم واحد قال هالشي مو من عاداتنا وتقاليدنا ؟جم واحد ماسك اليسار يمشي على بيض ومتعلق بالموبايل ؟ جم وحده معطله العالم في شغلها ولاهيه تلعب سولتير والا تاكل صمون ؟ جم واحد يشوف الغلط جدام عينه ويقول مالي شغل ؟ ... هذي اشياء بسيطه وطبعا لا تقاس على الواقع لكن هي مجرد مثال على تصرفاتنا اليوميه .. ومثلها كثير وكثير وكثير

الغلط يبدي صغير ويكبر اذا ماشاف احد يكافحه عن طريق تصحيحه .. هذا حالنا نسكت عن الغلط لين كل واحد يقعد يغني على ليلااه



ليش ما نقلد الغرب في كرافهم ؟ تشوفهم جنهم مكاين من 9 الى 5 .. وهني 7 ساعات جنهم مشتغلين 70 ساعه من التحلطم .. كلشي قاطينه على هالبنغاليين ولو راده لهم جان داوموا بدالهم !! متى نتعدل عشان كلشي بالديره يتعدل ؟؟؟



لحد هني وخلاص ماراح اكمل لاني قلت مابي اتحلطم واصير سلبيه مثل البعض



دعوه للتفاؤل مع الكويت :)
http://www.elaph.com/ElaphWeb/Technology/2007/9/260655.htm?SectionOnline=Tech...%20-%2036k%20-%2002-09-2007

قوس قزح

ساعات ودي اسولف ولا اسكت .. خصوصا اذا حسيت ان مخي خلاص صار متروس فيه الف شغله وشغله

بس المشكله انا ما اعرف اسولف .. اعرف اسولف بحدود يعني في موضوع معين او اذا كان في نقاش او تبادل معلومه لكن اهذر مني والطريج مثل اللي ماشاء الله يربطون سالفة مع سالفة ما اعرف .. يقولون انا مستمعه ممتازة بس ساعات املل اللي جدامي من كثر الهدوء اللي انا فيه هني انا احس ان في تناقض لاني انسانه عصبيه بس الناس تقول عني انا هاديه وايد الظاهر ليش انا من النوع الكتوم النوع اللي ما يشكي ابد الا اذا حس انه خلاص بينهار او بيموت وهذا غلط خصوصا في وقتنا الحالي .. الكل يعيش بضغوط ايا كان نوعها سواء كانت دراسية والا مهنية والا اجتماعية وحتى السياسيه ... حتى وانت ماشي بالشارع لازم تتنرفز من موقف والا موقفين

لما الانسان تصادفه مثل هالضغوط شيسوي ؟ شلون يريح مخه شوي ؟؟ شلون نقدر نغمض عن اللي حولنا ولو حتى بالجذب بس عشان نوصل الى لحظة من صفاء الذهن

انا عن نفسي محتاجه اسوي فورمات حق مخي جد يا ريت اقدر اسوي هالشي ... ودي ابدي حياة جديدة .. حياة مابي اقول مثالية لان هالشي مستحيل لكن خل اقول حياة فيها على الاقل راحه ذهنية ... ما تفكر ليش هذا ابيض وهذا اسود وليش الرمادي فاتح والبني مشوهب ولا ليش الاحمر غامق والبرتقالي وايد فاتح .. يعني خلينا نقول على قولة فجر السعيد بقناتها الحياة حلوه

تسوى والا لا

اليوم كنت اطالع فيلم اجنبي اسمه

((life or something like it ))

..........حلو الفيلم صراحه من تمثيل انجلينا جولي

يتكلم عن مذيعه مغروره ومستبده قابلت لها عراف او منجم كجزء من عملها قالها

انتي راح تموتين اخر الاسبوع ما صدقته في البداية بسبب غرورها والسبب الثاني

ان العراف هذا كان مشرد ... حبت تختبر مصداقيته وانصدمت لما طلع الكلام اللي

قاله صح ...عاشت طول الاسبوع وهي تحاول تخلي كلامه مو صحيح لكن ما قدرت

من ضمن الاحداث ترقت وهالترقيه خلتـــها تقابل مذيعه مشهورة وطبعـــا هالشي فرصة كبيره عشــان تثبت نفسها فارتجلت الحوار رغم ان هالمذيـــعه المشهوره اهي اللي حاطه الاسئله ومحذرتهم من انهم يغيرونها ,, سالتها سؤال واحد عفوي عفسها فوق تحت ,,قالت لها اللحين انتي مذيعه كبيره ومشهوره ... يا ترى هالشهره اللي وصلتي لها تسوى انج ضحـــــــــــيتي في اشياء وايد واهمها حياتج العاطفيه عشان توصلين للمكانه اللي انتي فيها اللحين ؟؟

طبعا المذيعة بجت

لو كل واحد سأل نفسه هالسؤال شنو راح يتغير ؟؟؟

انا عن نفسي ضحيت في اشياء وايد بعضها يسوى وبعضها مع الاسف ندمانه عليها... الندم مو عشان غلط ارتكبته لا الندم اني ضحيت عشان ناس اكتشفت انهم عايشين في الدنيا عشان مصلحتهم وهواهم وبس

ضعت :(

يا صقر واهنيك لك جناح تطـــــــــــــير *** لا طرالك نزعت وطرت يم الهـــــــــوا

بين قلبي وبينك فرق والله كبــــــــــــير *** لا كفخت انطلقت ولا كفخت التوى

انت حايم وانا بقاع دروبي اســــــــــــــير *** في صحاري زماني ذيب ليلي عــوى

فوق جوك سحاب وحدر جوي هجير *** القدم فوق رمضا والخفوق اكتـــــــــوى

الحذر يا صقر لا يشبكونك اســـــــــير *** ويل صقر يتله مربطـــــــــــــه لانـــــــــوى

برقعته الليالي فوق وكـــــــر قصــــــــــير *** عقب صفقه جناحه بالهوى لا هتوى

كل حر الى ضاق انتهـض للمطـــــــــــــير *** حومته بالسما ساعه لقلبــــــــــــه دوى

واعذاب الجناح اللي يجــــــره كســـــير *** كلما مكسور النواهض هــــــــــــــــوى

(( خالد الفيصل ))

ZZzzZ

نامي نومة هنية ...نومة الغزلان في البرية

اغنية كثير سمعتها من امي وانا صغيره ,, حتى اللحين بعض الاحيان اسمعها منها اذا كانت حدها رايقه عسى الله يعطيها الصحه والعافيه

انا كنت اعارضها مادري ذكاء مني والا غباء :) ... اقول لها شلون تنام الغزلان وهي تخاف من الذيابه لا تاكلها ؟؟ تضحك بدون اي اجابه

صج والله شلون تنام ؟؟ يمكن تنام ليش انها متطمنه ان الذيابه شبعانه و في سابع نومه !

صار لي تقريبا ساعه وانا ملاحظة امي نايمه وتطق روس ,, ودها تنام وبنفس الوقت ودها تظل صاحيه

ودي اقول لها نامي نومة هنية نومة الغزلان في البرية بس انا مقتنعه ان الغزلان ما تنام عدل

:)

(( الله لا يحرمني من رضاها ))

الا يستحق هذا الرجل منا وقفة وفاء ؟؟؟؟؟

----

{{شافاك الله وعافاك ودمت سعدا لنا }}

فوضى حواس

غريب يصادفك موقف تحس فيه بفوضى حواس

احاسيس متشابكه تلخبطك بالكامل بدون لا تعرف السبب

احساس بالخوف وبنفس الوقف احساس بالشجاعه !

احساس بالفرح وبنفس الوقت احساس بالحزن !

احساس بالقوه وبنفس الوقت احساس بالضعف !

احساس من يتابع مشاهد افتراس ,, يحس بالقسوة وبالضعف وبالرأفه

تنصدم لما تواجه انسان تشوفه قمة في القوة والرجوله ولكن لما تقرب منه تكتشف

انه مجرد مخلوق صغير هش وضعيف قوته الوحيده في لسانه بس

صدمة كبيره تخليك تعيش في فزع مثل اللي انا عايشته اللحين

فزع من اختلاط المفاهيم ,, فزع من قسوة الناس

فزع من الخسه ,, وفزع من العقوق

نلوم الزمن ؟ والا نلوم الناس ؟ مادري

نلوم الحداثه والمدنية ؟ والا نلوم الجهل ؟ مادري

ماني لاقية اي تبرير

الا انها

فوضى حواس مفزعه

مالي خلق :(

صج صج صج مالي خلق شي

مادري شفيني من يقرب موعد السفر يضيق خلقي واحس ان الدنيا بتنتهي !!

بعد تقريبا 6 ساعات ان شاء الله برجع الكويت

صج ولهت عليها وولهت على اهلي واكثر شي امي حبيبتي بطتي ... بس مالي خلق

احس في شي يقول لي قعدي ! مو تشاؤم ولا شي بس مليت من السفر مع ان الطيارة متعه ومطارات العالم شي غريب وعجيب ,, مطار تستانس فيه ومطار تسب وتلعن فيه من كثر ما هو كبير ومعقد

اللحين وانا قاعده اكتب تذكرت مطارنا الله يخلف علينا بالجنه بس

اكره شي عندي لما اطلع من بوابة الجمارك ,, من يفتح الباب والا هالممر الطويل والعالم اشكال والوان على اليمين وعلى الشمال وهات يا خز وتبقق عيون جنهم مو شايفين خير ,, انا احس ان هالممر جنه يخنقني

ما احب احد يخزني جذي اوووووووف

مالي خلق اسوي جنطتي ... مع انه كلشي جاهز بس هم مالي خلق اسويها واسكرها

اليوم يصادف عيد الام مادري عيد الاسره ,, مادري اي عيد هذا والاسره محد يدري عن الثاني

ليش الدنيا صارت غير ؟؟ ليش الناس تغيرت ؟؟ مو معقول انا غلط !!! مادري

توكلنا على الله

امبيه

امبيــــــــــــــــــــــــــــــــه

:(

Alone 4 ever

I have nothing 2 say ,, but i`m alone 4 ever

كوسا

قالوها المصريين ... الدنيا معكوسة ازرع خيار تطلع لك كوسا

ليش الناس تغيرت ؟

مادري الناس تغيرت والا انا اللي تغيرت !!

او يمكن انا اللي ما تغيرت .. كلشي جايز

اول مره بحياتي احس بالم فظيع في صدري ,,تابعت افلام وايد وقريت قصص وراوايات ومقالاات بس عمري ما تخيلت ان الالم النفسي والصدمة بتكون حقيقية وموجعه الى هالدرجه هذي !! ... سبحان اللي خلقنا

تغربت سنين في حياتي وكل يوم اقول ميخالف صبري باجر ان شاء الله بترجعين حق اهلج وربعج وبترتاحين عقب هالسنين الطويلة ,, بتلقين اخوانج وخواتج يحضنونج ويظللون عليج وينسونج هم هالغربه الطويلة اللي خذت من عمري كلشي حلو والسبب التفكير والقلق ...

رجعت ويا ليتني ما رجعت ,,, اللي بغيتهم يسندون ظهري ويستقبلوني بابتسامه على الاقل طعنوني في صدري طعنة مثل ما يقولون اصابت في مقتل ,, طعنة صدمتني واذهلتني صراحه ,, صدمة قلبت مفاهيمي اللي تعلمتها بهالدنيا طول سنين غربتي

علمتني غربتي اني اعطي ما اخذ الا اللي لي ,, تعلمت ان الصدق منجاة من كل شر ,, تعلمت اني احب الناس مثل ما ابيهم يحبوني وتعلمت اني اعاملهم باخلاق امي وابوي واجدادي ,, الاخلاق اللي كلها صدق وود وايثار واخلاص

صادفتني مشاكل وقدرت بالصبر والتوكل على الله سبحانه اني احلها والحمدلله حليتها كلها وتعلمت منها الا مشكلة وحده ماني عارفة الى هذه اللحظة شلون بتعامل معاها او حتى افكر فيها من كثر ماهي مشكلة غريبة

فجاه وبدون سابق انذار لقيت اقرب الناس لي يعادوني وعلى خلاف معاي ,, ليش ؟؟ مادري !! شي غريب والله

حاولت اني افهم الموضوع بالضبط ما قدرت وسطت ناس كثير بس انقلبوا ضدي ,, انصدمت

طيب شنو الموضوع ؟؟ انا غلطت في شنو ؟؟ شنو الجريمة اللي سويتها عشان كل هذا يصير ؟؟ ماكو جواب الى اللحين

مو معقول هالحجي ولا يدش المخ اصلا ادري والله ادري انه ما يدش المخ بس هذا اللي صار

قلت خليني ابدا من البداية واصير مثل شارلوك هولمز ادور خيوط المشكلة ,, ما لقيت شي ابد ,, غريب

قلت خل اسال اللي بدوا الخلاف معاي يمكن المس من ردهم شي يساعدني ارجع شريط افكاري الى خيط صغير لسلوكي الخاطيء هم ماكو فايده لقيتهم يصدون زياده وزياده ,, يه !! شسالفة انا حلمانه والا شنو بالضبط ؟؟؟ مادري

تعالي يا بنت الحلال عسى ماشر شفيج زعلانه ؟؟ تصد عني وتمشي !! مره ثانيه تعالي فهميني شصاير ؟؟ تقولي جب يا حيوانه !! يه شنو الموضوع ؟ شسالفة ؟ شصاير ؟؟ شسويت وانا مادري ؟؟ ماكو رد اذا الطوفة ترد اهي ردت

مرت سنة اللحين والحال قاعد يزيد صرت انا الجانية عقب ما كنت الضحية !! لا والعالم تبيني اروح اقولها انا اسفه على شي ما سويته !! اي منطق هذا ؟؟

انا اعرف ان اللي يغلط يعتذر وبعضهم يكابرون لين يملون بعدين يعتذرون لكن عمري ما سمعت عن ناس ما غلطت ويبونها غصب تعتذر وعلى شنو تعتذر ؟؟ ما يدرون !! شهالحجي

تبوني اعتذر ؟؟ ميخالف بس قولوا لي شسويت عشان تزعلون ؟؟ شغلطت فيه انا عشان جذي تحاربوني لا وتبوني ابوس راسكم واعتذر

قالوا حدث العاقل بما لا يعقل فان صدقك فلا عقل له ,, انا مو مصدقه اللي قاعده اشوفه جدامي لانه شي ما يدش مخ المينون مو بس العاقل .. شصاير بالدنيا !!! شي مو معقول والله

ابي اعرف شي واحد بس .. شسوييـــــــــــــــــــــــــــــــــــــــــــــــــــــــــــت !!!؟

كوساااااااااااااااااااااااااااا

شخابيط

خلوني اقول صباح الخير اول شي

اللحين الساعه 3:58 الفجر كنت قاعده اطالع فيلم اسمه ((هوليوود فلايز )) واحداث الفيلم بطت جبدي شوي لاني ما احب المجني عليه تلاحقه الشرطه وتخلي الجاني ,, يعني السالفه حرق اعصاب جنك قاعد تطالع مباراة كرة قدم بين القادسية والعربي والحكم ما يدري وين الله قاطه !! .. فقلت خل ابطل الكمبيوتر احسن وابدي اشخبط في هالبلوق

ما اظن في احد يقرا كلامي بس عادي ابي اطلع اللي بقلبي واتحلطم شوي

بتحلطم اول شي على البرتقاليين ,, اكيد بتقولون انا مع الدوائر 25 وضد 5 !! لا انا مع الدائرة 1 ,, يمكن اكون غلطانه بس انا هذا اللي اشوفه صح عشان الكويت ,, لا ناس تنتقل من مكان الى مكان ,, ولا ناس تفتن على المذاهب ولا ناس تبيع ضميرها وتبيع ديرتها عشان كرسي مادري شنو مستفيد منه ؟؟؟ ولا حرب كلام وهواش وصراخ محنا عارفين نتيجتها

تبون تصلحون الديره ؟ تبون تعترضون ؟ تبي تحاربون الفساد ؟ تبون وتبون وتبون ؟؟ صلحوا نفسكم بالاول .. شلون ؟؟ لا تقلدون وبس هذولاك سووا جذي خنقلدهم ,, برتقالي ؟ .. يلا نلحق ايرلندا واوكرانيا ولبنان

شنو يعني اللون البرتقالي ؟؟ يعني حقد وتفرقه ؟ هذا اللي تبونه يعني ؟وهذا اللي قاعده اشوفه يصير

ليش ما تبدون بداية صح ؟؟ ليش ما تفكرون صح ؟ ليش ما تقولون شلون نوصل لهم صوتنا ؟ شلون يحسون ان احنا مو راضين على اللي قاعد يصير بالديره ؟؟ وان احنا نبي ديرتنا احلى مكان بالعالم كله وان احنا ملينا من هالاوضاع ؟؟ ملينا من فيتامين واو بكل مكان حتى بموقف السيارات !!..ملينا من البوق .. ملينا من غسيل الاموال .. ملينا من الانحلال الاخلاقي .. مليناااااااا وملينا

الظاهر احنا تعودنا على الكسل نبي غيرنا يصلح لنا واحنا بس نصفق لك ,, والا نصرخ له ,, والا نطلع مظاهرات واعتصامات ونتفق ان نلبس لون معين بغض النظر اذا هو صح والا غلط ؟؟ يوصل الرساله والا لا ؟؟ لايق والا مو لايق... مع الخيل يا شقرا

لو كان عندي رسالة ابي اوجهها حق احد او احتجاج معين او اعتراض او رفض ,, افكر شلون الناس تفهمني ,, شلون اعبر عن اللي ابيه بسلوكي الصحيح بالدرجه الاولى بمنطقي وحجتي مو بصراخي وهواشي وتصرفاتي اللي قاعده تفتح المجال للغير انه ينتقدني او يقيد حركاتي

انا مو ضد الكل بس البعض ,, ضد اللي شفته في مجلس الامة من الشباب اللي لابس لو ويست وموقف لي شعره جنه ديج طاب بطشت ماي والبنات اللي تارسه وييها مكياج ولابسه كلشي بس مو خاش شي ,, والكبار اللي كانوا قمة في الرزانة والثقل صاروا جنهم ريشة بعقولهم الخفيفة ,, في شي اسمه ذوق عام ما تبون ذوق عام ميخالف على الاقل احترام النفس شوي ,, انت قاعد تطالب بقضية تهم الديره قضية اهي اللي تحدد مستقبل ديرتك مو رايح تشجع فريق كرة قدم والا تستقبل فنان بالمطار !!!

مادري ليش حسيت اني قاعده اطالع ستار اكاديمي وانطر منو يطلع نومينيه ومنو يقعد وهالخرابيط

انحل المجلس.. وبدا التحضير حق الانتخابات ,, وهذي المرة الاولى اللي تشارك فيها المرأه ,, انا استبشرت خير صراحة لما انحل المجلس ,, بس تبون الصج تحسفت ,, شنو هذا اللي قاعد يصير !! شي مو معقول

انتوا تبون 5 دوائر صح ؟؟ ركزوا نشاطكم في شلون البشر تختار منو الاكفء انه يكون صوتهم ويقول نبي الكويت نظيفه من الفساد ,, نبي الكويت نظيفة من الطائفية ,, نبي الكويت نظيفه من الجرايم بكل انواعها.. نبي الكويت نظيفة من الاستهتار واللامبالاة ,,.. نبي الكويت مثل القماشة نظيفة وتلمع يشوفها البعيد قبل القريب

ودي افتح واغمض والاقي الكويت احسن ديرة واحلى ديرة وانجح ديرة بحكامها وشعبها ومقيمينها ,, ودي اشوف الشباب الكويتي احسن شباب ,, ما اقول طلعوا القمر لا والا حطوا لنا مفاعل نووي !! لا ,, ودي اشوف العلم و الادب والاخلاق والاحتشام .. ما اقول تنقبوا ولا تحجبوا والا خل توصل لحيتكم لما ركبكم لا ,, كل واحد وعمله بكيفكم ,, .. بس عاملوا الناس مثل ما تحبون ان اهما يعاملونكم ,, خلوهم يقولون يا حلات الكويت ويا حلات اهلها

و يا ريت احنا كويتيين

ما عندي سالفه صح ؟!؟

:)

6:03 Am

if you see this you should say

what a lovely morning to start

my day with ,, is`nt it ??

:)

بدايتي

ليت الذي بيني وبينك عامر ... وبيني وبين العالمين خرابُ

اذا نلت منك الود,, فالكل هين ... وكل الذي فوق التراب ترابُ