شسالفه

شسالفه !!!
الظاهر في موضه بين المدونين يسكرون مدوناتهم ويخلونها بس للمدعوين!

صح ان التدوين حرية شخصية ومحد يتحكم او يفرض على المدون شي في غير إرادته .. لكن في بعض المدونات صارت مسئولية على صاحبها وواجب علينا ...

وايد مدونات قدروا أصحابها يوصلون رسائل  للقراء .. رسائل مختلفه منها اجتماعي ومنها سياسي .. 

أنا شخصيا افرح وافتخر ان في الكويت مدونين على درجة كبيرة من الوعي والثقافه ..  وأسلوبهم سلس وتلقائي ..

وأحزن وساعات تنبط چبدي اذا دشيت مدونة مداومة على قرائتها وألقاها مسكرة !!

أكيد الكل عنده اسباب فرضت عليه انه يحصر قراء مدونتة في ناس معينة لكن .. حسافه !!

اتمنى هالشي يكون مؤقت ونرجع نشوف المدونات مبطله ومتروسه تحلطم وانتقاد وخرابيط والاهم رسالة بين السطور ...

خطوه

تعلمنا بالمدرسة ان الصحه تاج على رؤوس الاصحاء ولا ندري شسالفة ... نرددها مثل البغبغاء

فجأه وبدون سابق انذار تقعد تفكر شنو يعني هالجمله؟؟

والمصيبه ان هالتفكير ما يشتغل الا لما غالي عندك يطيح مريض

ليش ما نداري على عمرنا وصحتنا ؟؟

ليش ما نسوي مثل الاجانب ما ياكلون الا الصحي والعضوي؟؟

ليش احنا اذا طحنا دورنا الطبيب لو هو بآخر الدنيا ؟؟

حرقة قلب .. ودمار نفس .. لما اشوف اللي علمني اول خطوه يتمنى لو يخطو خطوه

:(

سبحانك اللهم الشافي المعافي

الام

يمكن كلنا نردد كلمة ( يما) دايما سواءا لما ننادي امنا والا نخاف من شي والا نستغرب !!
يمكن تكون هي كلمة بسيطه محد يوقف عند معناها ويتفكر فيه .. بس هالوقت خلانا نفكر فيها

قصة سمعتها عن ام وصراحه ماني عارفه القى لها تفسير !!

هي ام .. طيبة وحنونه .. مسخره كل وقتها لبيتها وزوجها وعيالها
رزقها الله بنتين وولدين .. واحد من الاولاد توفى الله يرحمه
بوفاة الولد قلب هالمسكينه انفطر والحزن لقى منفذ لحياتها .. لكن ايمانها بالله قوي وصبرت على فرقاه
لين الله ابتلاها بمرض السكري ومع الاسف بدا هالمرض ينهش في جسمها .. وفوق كل هذا صابره
للامانة اللي كانت تراعيها وتخدمها هي خدامتها .. مسيحيه لكن رحمة الدنيا كلها فيها .. بس مع الاسف
بنات هالمسكينه عادوها وحطوا دوبهم ودوب هالخادم وهالشي سبب قطيعه بين الام وبناتها
سافرت الخادم .. وانتظرت هالام بناتها يدخلون عليها .. يحنون عليها مثل ما كانت تسوي خادمتها .. لكن ؟؟؟
مرت 3 سنين ولا حس ولا خبر ..
معقول ؟؟ معقول في ناس يصبرون عن والدينهم هالسنين ؟؟
ومعقول انا ابيع رضا والديني عشان خادمه كانت مريحه امي ؟؟؟
شلون ينامون الليل ووالدينهم مو راضين عليهم ؟؟؟
شنو هالزمن اللي احنا فيه ؟؟ وشنو هالبشر اللي نفوسها صارت مثل الصخر لا تحس ولا تنكسر !!؟


الرحمة انتزعت من القلوب خلااص !!
قبل يومين كنت في مركز سلطان .. والا هالشايب اللي على كرسي متحرك يدزه هندي ووراه 3 فلبينيات !!
طبعا هالخدم ما يدرون عنه وطايحين له ضحك مع السايق وهو يطالع بعيونه ويحن ودوني صوب التمر والهندي يقوله صبر صبر !!
وين عياله ؟؟ والا ما عنده احد ؟؟ مافي اخوان والا خوات والا عيالهم ؟؟

ويقولون شسالفة هالغبار اللي تارس الديره ونتحلطم منه ؟؟؟


ما اقول الا يالله انك تهدينا لانفسنا ولوالدينا

متى؟

مهما نغيب عن الديره ماكو شي يتغير

انحل المجلس وبعدين ؟؟

نفس الحنه والرنه اشتغلت

نفس الاسفاف واللعب على عقولنا رجع

نفس السخافه والسطحيه نعيشها كل يوم ..

لا من بشر يقابلونك .. ولا من اعلام مقروء ومسموع .. ولا من نت..

عقلية البشر مثل ماهي ما تغيرت ..

الديره طاحت ووقفت وردت طاحت ووقفت والبشر مكانك راوح لا الا للخلف در !!

صاحب السمو عطانا مفتاح نقدر نغير فيه كلشي بالديره .. المفتاح اهو حل المجلس

وقال لنا احسنوا الاختيار .. ماباقي شي

بيدنا ترى نغير اللي ما يتغير ,, بيدنا نختار الصح ونترك الخطأ

بسنا فزعه على الفاضي .. بسنا من ماكو بهالبلد الا هالولد

بسنا من انا وولد عمي على الغريب .. بسنا من قبيله وطائفه

بسنا من فلان ليبرالي وفلان اسلامي وفلان زحير

صراحه انا شخصيا مليت .. مليت من اللي اشوفه كل يوم

مليت من هالتشنجات اللي بالديره

مادري منو من المرشحين قال الكويت تنادينا .. صج الكويت تنادي

كل مكان فيها يصرخ بس خلاص كااااااااااااااااافي

يا ناس حبوا ديرتكم .. وحمدوا ربكم على النعمه اللي انتوا فيها

حبوا ديرتكم بشغلكم.. بدراستكم .. وشدوا حيلكم

حبوا ديرتكم باخلاصكم لها في كل شي .. حتى الكلينكس لا تحذفونه من السياره .. عيب عليكم

حبوا ديرتكم وفتحوا عيونكم على هالمرشحين .. واختروا بامانة وضمير .. اختاروا الكويت وبس

متى؟

والله متى نحس ان احنا بشر قد المسئولية ؟؟

انا ما احب اقارن نفسي بالغير لكن من زمان وانا اقول

متى نصير نفس اليابانيين؟ والا الالمان ؟؟

ولا في الاحلام طبعا دام هذي عقولنا المتحجره .. مهما تثقفنا وتعلمنا ما نقدر نشوف الصح من الغلط لان احنا بصراحه خوافين .. اي نعم خوافين .. نخاف نقول حق فلان اوقف حدك الا الكويت

نخاف نقول حق علان حتى لو كان اخوي والا ابوي ليش سويت جذي ؟؟ ليش ما خفت على الكويت؟؟؟ انت

غلط !!!

حتى الوافد قاعد يلعب بالديره كره والسبب احنا .. نشوفه يبوق ويزور ونصد عنه .. مالنا شغل !!؟

همنا مصلحتنا وبس .. همي تمشي معاملتي واترقى واتعالج بره والا اخذ استثناء من القانون .. كله قفز حواجز على مصالح الناس !! ماااا يهمني .. انا وبس .. هذا المنطق اللي ماشي هالايام

متى بنشوف الكويت مثل قبل .. الناس تبي تشوف المستقبل وانا ابي اشوف قبل

متى بشوف اهلها على قلب واحد ..؟

متى اشوف اهلها قلبهم الكويت وبس؟

احترقت قلوبنا والله والسبب بعض ضعاف النفوس

لا خوف من الله ولا خوف من الناس

متى الله بيفكنا من هذول ؟؟

بس مالي خلق اكمل

حروف

موعد مع القدر رتبته لي 3 حروف

حروف فتحت عيوني وسمعتها في البداية .. كتبتها .. حفظتها

حروف كبرت معاي .. لين كتب لي نصيب فيها

القدر صمم تلازمني ال 3 حروف .. حسيتها غير ..مع انها مثل ماهي

حبيتها وعشقتها .. انولدت من جديد على ايده .. علمني وعلمني وعلمني

اعترف ان في اشياء مابي اتعلمها لاني اكرهها فيه لكن تعلمت اغمض

انجرحت .. تألمت .. حاولت اداوي جروحي لكن ما قدرت .. تناسيتها

واللحين بدا القدر يلعب لعبته ... الله يستر

رسالتها البيضاء

هل تشعر بي ؟

هل تحس بما يجول في داخلي ؟

هل تشعر بالقلب الذي يهيم بك ؟.. والاحساس الذي انت فؤاده ؟

هذا الاحساس الذي يصمد ويقاوم رغم كل البعد والبرد ..

احتاجك اكثر مما تتخيل ..

انا معك فراشة بيضاء تبحث عن حضن يحتويها ..

يطول يومي ويصبح الزمن خصمي .. وانا اتنقل من فكرة الى اخرى ومن ترقب الى انتظار

اتأمل المكان .. حيطان تراقب ديمومة الانتظار .. مساحات ضيقة ومحيط رتيب ..

احساس بالوحده يتملكني .. عالم باهت بدونك .. يتلهف للحياة والفرح .. ينتظر هطول غيث السعادة مع قدومك

احتاجك ليس فقط كيانا اراه يتجسد امامي .. بل روحا واحساسا

اريدك ان تشعر بي .. تشاركني لحظاتك وافكارك .. حاورني .. تفهم مشاعري .. كلمة واحده منك تنقلني الى فضاء حالم وجميل

ونظرة غامضة تجعلني اعيش في حيرة وقلق !

انت تمتلك كل مفاتيحي .. معزوفة لديك تتلهف همساتك لتصوغها .. كتاب مفتوح ينتظر لمسات اصابعك الحانية .. الى قراءة حروفه لتنساب الكلمات بين راحتيك طوعا

يا شخصا احتاجه كالنبض للوريد .. كالفرح للابتسامة ؟؟ كالهدب للعين

يقتلني فيك التناسي والفتور .. اين الحوار ؟ اين الكلمات الدافئة ؟

انا كائن يعيش بالحب وللحب .. فلا تحرمني من الحنان .. احتاج ان اتحدث اليك .. وان اسمع لك

شاركني حياتي .. تفاصيلي الصغيرة .. جملي الناقصة .. ضحكاتي .. حركات يدي .. حتى خيالااتي .. احتلها .. امتلكها .. فقط ؟؟؟ حاول ان تفهم فيني الانسان !

(( محمد فهد الحارثي))

اغضب

اغضب لرسولنا الكريم عليه الصلاة والسلام

اغضب للدين الاسلامي السمح

تضامن مع الامة الاسلامية في مقاطعة المنتجات الهولندية

من 10 الى 25 ابريل

ثلاثة اسطر بسيطه ترسلها من موبايلك الى اكبر شريحة من معارفك ,, رسالة متواضعه في عباراتها لكنها قوية في مضمونها اللي هو ان رسولنا صلى الله عليه وسلم وديننا الاسلامي خط احمر ممنوع احد يسيء اليه باي صورة كانت

الدنمارك - هولندا - سويسرا ... ننطر بعد احد يسيء لنا !! والا نقول لهم بس كافي ؟؟؟