خلوني اقول صباح الخير اول شي
اللحين الساعه 3:58 الفجر كنت قاعده اطالع فيلم اسمه ((هوليوود فلايز )) واحداث الفيلم بطت جبدي شوي لاني ما احب المجني عليه تلاحقه الشرطه وتخلي الجاني ,, يعني السالفه حرق اعصاب جنك قاعد تطالع مباراة كرة قدم بين القادسية والعربي والحكم ما يدري وين الله قاطه !! .. فقلت خل ابطل الكمبيوتر احسن وابدي اشخبط في هالبلوق
ما اظن في احد يقرا كلامي بس عادي ابي اطلع اللي بقلبي واتحلطم شوي
بتحلطم اول شي على البرتقاليين ,, اكيد بتقولون انا مع الدوائر 25 وضد 5 !! لا انا مع الدائرة 1 ,, يمكن اكون غلطانه بس انا هذا اللي اشوفه صح عشان الكويت ,, لا ناس تنتقل من مكان الى مكان ,, ولا ناس تفتن على المذاهب ولا ناس تبيع ضميرها وتبيع ديرتها عشان كرسي مادري شنو مستفيد منه ؟؟؟ ولا حرب كلام وهواش وصراخ محنا عارفين نتيجتها
تبون تصلحون الديره ؟ تبون تعترضون ؟ تبي تحاربون الفساد ؟ تبون وتبون وتبون ؟؟ صلحوا نفسكم بالاول .. شلون ؟؟ لا تقلدون وبس هذولاك سووا جذي خنقلدهم ,, برتقالي ؟ .. يلا نلحق ايرلندا واوكرانيا ولبنان
شنو يعني اللون البرتقالي ؟؟ يعني حقد وتفرقه ؟ هذا اللي تبونه يعني ؟وهذا اللي قاعده اشوفه يصير
ليش ما تبدون بداية صح ؟؟ ليش ما تفكرون صح ؟ ليش ما تقولون شلون نوصل لهم صوتنا ؟ شلون يحسون ان احنا مو راضين على اللي قاعد يصير بالديره ؟؟ وان احنا نبي ديرتنا احلى مكان بالعالم كله وان احنا ملينا من هالاوضاع ؟؟ ملينا من فيتامين واو بكل مكان حتى بموقف السيارات !!..ملينا من البوق .. ملينا من غسيل الاموال .. ملينا من الانحلال الاخلاقي .. مليناااااااا وملينا
الظاهر احنا تعودنا على الكسل نبي غيرنا يصلح لنا واحنا بس نصفق لك ,, والا نصرخ له ,, والا نطلع مظاهرات واعتصامات ونتفق ان نلبس لون معين بغض النظر اذا هو صح والا غلط ؟؟ يوصل الرساله والا لا ؟؟ لايق والا مو لايق... مع الخيل يا شقرا
لو كان عندي رسالة ابي اوجهها حق احد او احتجاج معين او اعتراض او رفض ,, افكر شلون الناس تفهمني ,, شلون اعبر عن اللي ابيه بسلوكي الصحيح بالدرجه الاولى بمنطقي وحجتي مو بصراخي وهواشي وتصرفاتي اللي قاعده تفتح المجال للغير انه ينتقدني او يقيد حركاتي
انا مو ضد الكل بس البعض ,, ضد اللي شفته في مجلس الامة من الشباب اللي لابس لو ويست وموقف لي شعره جنه ديج طاب بطشت ماي والبنات اللي تارسه وييها مكياج ولابسه كلشي بس مو خاش شي ,, والكبار اللي كانوا قمة في الرزانة والثقل صاروا جنهم ريشة بعقولهم الخفيفة ,, في شي اسمه ذوق عام ما تبون ذوق عام ميخالف على الاقل احترام النفس شوي ,, انت قاعد تطالب بقضية تهم الديره قضية اهي اللي تحدد مستقبل ديرتك مو رايح تشجع فريق كرة قدم والا تستقبل فنان بالمطار !!!
مادري ليش حسيت اني قاعده اطالع ستار اكاديمي وانطر منو يطلع نومينيه ومنو يقعد وهالخرابيط
انحل المجلس.. وبدا التحضير حق الانتخابات ,, وهذي المرة الاولى اللي تشارك فيها المرأه ,, انا استبشرت خير صراحة لما انحل المجلس ,, بس تبون الصج تحسفت ,, شنو هذا اللي قاعد يصير !! شي مو معقول
انتوا تبون 5 دوائر صح ؟؟ ركزوا نشاطكم في شلون البشر تختار منو الاكفء انه يكون صوتهم ويقول نبي الكويت نظيفه من الفساد ,, نبي الكويت نظيفة من الطائفية ,, نبي الكويت نظيفه من الجرايم بكل انواعها.. نبي الكويت نظيفة من الاستهتار واللامبالاة ,,.. نبي الكويت مثل القماشة نظيفة وتلمع يشوفها البعيد قبل القريب
ودي افتح واغمض والاقي الكويت احسن ديرة واحلى ديرة وانجح ديرة بحكامها وشعبها ومقيمينها ,, ودي اشوف الشباب الكويتي احسن شباب ,, ما اقول طلعوا القمر لا والا حطوا لنا مفاعل نووي !! لا ,, ودي اشوف العلم و الادب والاخلاق والاحتشام .. ما اقول تنقبوا ولا تحجبوا والا خل توصل لحيتكم لما ركبكم لا ,, كل واحد وعمله بكيفكم ,, .. بس عاملوا الناس مثل ما تحبون ان اهما يعاملونكم ,, خلوهم يقولون يا حلات الكويت ويا حلات اهلها
و يا ريت احنا كويتيين
ما عندي سالفه صح ؟!؟
:)
